Mari Rege skal leie ekspertgruppe for barn i fattige familiar

– Eg ser fram til å ta fatt på dette viktige arbeidet saman med dei andre medlemmene i ekspertgruppa, seier Mari Rege.

Fredag 12. august oppnemnde regjeringa ekspertgruppa som skal foreslå tiltak som gir barn som veks opp i fattigdom betre levekår og skal førebygge at fattigdom går i arv.

Ei kompleks samfunnsutfordring

– Me har fått eit godt mandat som utgangspunkt for vårt arbeid. Det å vakse opp i fattigdom er ei kompleks samfunnsutfordring og det finnest eit stort apparat med moglege tiltak. Spørsmålet er kva som er mest effektivt, både for å gje barna ein god og inkluderande barndom, men også for at dei skal få gode moglegheiter til å lykkast med utdanning og arbeid, seier Rege.

Ho forklarer at det er mykje relevant forsking, både internasjonalt og nasjonalt og frå fleire forskjellige fagfelt.

– Denne forskinga skal me sjå grundig på, og ho vil ligge til grunn for drøftinga i ekspertgruppa. I tillegg skal me møte med relevante aktørar, som offentlege instansar og frivillige organisasjonar, og barn og unge som opplever fattigdom.

Svært nøgd med gruppa

– Sjølv om fleire regjeringer har arbeida med å motverke fattigdom blant barnefamiliar, er talet på barn i fattige familiar likevel aukande. Ei ekspertgruppe kan gi oss nye råd om korleis innsatsen for barn i fattige familiar bør prioriterast framover, seier barne- og familieminister Kjersti Toppe (Sp) i ei pressemelding frå regjeringa.

Ekspertgruppa har desse åtte medlemmene, som alle har relevant kompetanse på dei saksområda som skal greiast ut:

• Leiar: Mari Rege, Stavanger, professor
• Kjell Gunnar Salvanes, Bergen, professor
• Henrik Daae Zachrisson, Oslo, professor
• Tormod Bøe, Bergen, professor,
• Hanne Solfrid Glemmestad, Gjøvik, leir for profesjonsrådet for sosionomar i Fellesorganisasjonen
• Tone Fløtten, Oslo, dagleg leiar
• Kjell Hugvik, Bodø, kommunaldirektør
• Nina Eirin Drange, Oslo, Post Doc

– Eg er svært nøgd med samansettinga av ekspertgruppa og eg har stor tru på at no vi vil få ei utgreiing av høg kvalitet og forslag som vil vere viktig i regjeringa sitt arbeid for å redusere fattigdom i barnefamiliar, seier Toppe.  

Les mandatet her.