Oslo Universitetssjukehus er ny partnar i SHARE

Oslo universitetssjukehus (OUS) gjekk inn som partnar i SHARE - Senter for kvalitet og sikkerhet i helsetjenesten i 2023.

– Dette partnarskapet sikrar eit tett samarbeid mellom Noregs største kliniske miljø og Noregs største forskingsgruppe innan pasienttryggleik og kvalitet i helsetenester. Vi er veldig glade for å ha OUS med på laget og ser fram til nye og spennande samarbeidsprosjekt med dette solide miljøet, seier senterleiar Siri Wiig.

OUS er Noregs største helseføretak og er eit komplett akuttsjukehus med alle medisinske og kirurgiske spesialitetar, i tillegg til fleire nasjonale spesialfunksjonar.

Fleire lokale og nasjonale medisinske kvalitetsregister har drift og sekretariata sine lokalisert ved OUS, og det er strategisk viktig for dei, som det største universitetssjukehuset i landet, å styrka forståing og praksis i arbeidet med pasienttryggleik.

Prehospital pasienttryggleik og akuttmedisin

Det akuttmedisinske tilbodet ved OUS skal dekke nesten ein tredel av den norske befolkninga. Kvalitet og tryggleik i dette tilbodet er derfor ikkje berre viktig, men svært synleg.

–  Forsking og forbetring av pasienttryggleik og kvalitet krev ei heilskapleg tilnærming til heile pasientforløpet frå første førespurnad til medisinsk nødmeldeteneste til rehabilitering etter utskriving. Sjukehuset ønsker å gjennomføra arbeidet med pasienttryggleik i helseføretaket forskingsbasert og slik at vi og andre kan læra og bli betre, seier Stephen J.M. Sollid som er klinikkleiar ved OUS.

Til samarbeidet med SHARE vil dei derfor i første omgang satsa på forsking på tryggleik for pasientar før dei blir lagt inn på sjukehus og korleis ein kan forbetra kvaliteten på tenestene.

– Vi vil også samarbeida om tilgang til data, ressursar innan analyse, rettleiing av forskarar, og utvikling av nye forskingsprosjekt, legg han til.

Spisskompetanse på feltet

OUS tar med eigen spisskompetanse på området inn i samarbeidet, samt tilgang på helsedata og forskingsstøtte frå Akuttklinikken og Prehospital klinikk.

– Vi ønsker å ha minst eit ph.d. prosjekt til ei kvar tid som er knytt til dette samarbeidet, forankra i forskingsstrategien i SHARE, og med rettleiarar frå minst to av senterdeltakarane. To ph.d. prosjekt oppfyller allereie desse krava, men fleire vil komma til, fortel Sollid.

Samarbeidet kan gi moglegheiter for ekstern finansiering av felles prosjekt gjennom tildeling av midlar frå Forskingsrådet, EU-program, Helse Sør-Øst, andre regionale forskingsmidlar, eller intern finansiering frå OUS eller UiO. Samarbeid med industrien eller filantropiske stiftingar kan også vera aktuelt.