Delar beste praksis innan akuttmedisinsk opplæring

SAFETY er eit Erasmus+ prosjekt med 10 samarbeidspartnarar frå 7 europeiske land. Fem universitet skal jobba saman med selskap som utviklar simuleringsverktøy i arbeidet med eit nytt kurs innanfor det akuttmedisinske fagområdet.

Kurset skal bestå av både praktiske og teoretiske modular. Dei teoretiske modulane skal leverast som e-læringsmodular. Dei praktiske modulane vil implementerast som klasseromsundervisning der studentane skal bruka simuleringsverktøy som ein del av undervisninga.

Som partnar i prosjektet vil UiS bli ein del av eit europeisk treningsnettverk som gjer mogleg deling av beste praksis. UiS vil få eit særskilt ansvar for å leia arbeidet med å gjennomføra ein litteraturstudie der målsetjinga er å identifisera korleis ein skal setja saman eit optimalt team for trening ved bruk av simuleringsutstyr.

UiS skal i tillegg leia arbeidet med å utvikla materiell som skal nyttast til å simulera situasjonar der pårørande til pasientar får panikk og situasjonar der ein nøkkelperson i teamet ikkje er tilstades. Slike situasjonar kan ha ein negativ påverknad på teamet som jobbar med pasienten og i verste fall redusera moglegheita for overleving i ein akutt situasjon.

Prosjektet blir leia av Università degli studi di Foggia i Italia.